Stul di felpa

Stul di felpa
Tin biaha ta difísil pa entregá un posishon di poder. Diferente dicho i proverbio ta indiká esaki:
"E stul di felpa ta sinta kómodo" etc. Pa komisarionan esaki no ta otro. Den pasado mi a yega di
skibi kaba tokante e inklinashon di sierto komisario pa rèk nan poder legal i statutario, dor di bai
sinta riba stul di gerensia. Esaki ta un aspekto di oumento di poder no-deseá. Un otro aspekto di
oumento di poder ta kontinuamente posponé e baimentu. Aki un dilema interesante ta hunga un ròl.
Si fòrsa un komisario muchu lihé pa bandoná e posishon (manera ku lástimamente hopi biaha ta e
kaso na nos NVnan di gobièrnu), e ora ei e no por hasi su trabou di forma efektivo. T’asina ku bo
mester di un tiki tempu pa siña konosé e kompania di paden i di pafó. Si bo no konosé e kompania,
bo no por ta un bon komisario. Di otro banda, si un komisario keda sinta muchu largu, e ora ei hopi
biaha ta manera kos ku e ta bira parti di e mobilario. E ora ei muchu tiki idea nobo ta keda presentá i
e no ta duna sufisiente resistensia relevante na gerensia. E ora ei e pregunta kardinal ta tambe: ki ta e
kaminda meimei korekto? Kon largu un komisario mester (por) keda sinta pa por (keda) traha di
forma efektivo? Generalmente esaki, segun mi, ta varia entre minimal 6 aña i maksimal 12 aña, sin
konsiderá eksepshonnan.
Fiha durashon di sintamentu
Tin un manera so pa regulá esaki korektamente i esei ta dor di stipulá esaki delantá, den e statutonan
òf den reglamento pa e Hunta di Komisario. E statutonan, por ehèmpel, por determiná ku por
nombra komisarionan pa un periodo di maksimal kuater aña i ku despues nan por keda renombrá un
òf dos biaha. Un sistema asina no solamente tin e bentaha ku e durashon di sintamentu maksimal ta
limitá, pero tambe e bentaha ku kada biaha despues di un periodo di kuater aña, e akshonista por
disidí pa no mantené e komisario en kestion, por ehèmpel pa motibu di un funshonamentu
insufisiente.
Renombramentu regularmente
Tin biaha seis aña ta muchu largu i tin biaha diesdos aña ta muchu kòrtiku. Kon bo mester
determiná esaki? Tin solamente un manera pa tene komisarionan skèrpi: mester tin un forma di
evaluashon (propio). Fuera di esei, e ta un tópiko apart ku mi lo skibi mas di dje despues. Dor di
evaluashon regular i dor di evaluashon propio, e efektividat (relativo) di e komisario ta bira mas
visibel. Resultado di tipo di evaluashonnan asina por yuda determiná e ora ei si ta presentá un
komisario, despues ku su promé òf di dos término di kuater aña vense, serka e akshonista pa
renombramentu. Sierto kompania den sektor privá ta nombra nan komisarionan kada biaha
solamente pa un periodo di un aña. Esaki si ta mantené bo skèrpi. Benta kurpa patras den e stul di
felpa no ta posibel e ora ei.
Bo tin pregunta tokante di corporate governance? Sea asina bon di mand’é na
[email protected] i ken sa, bo pregunta lo por wòrdu trata den nos próksimo
kolumna!
1