Balor agregá

Balor agregá
Konosé bo mes. Algun siman pasá mi a trese dilanti kon un bon sistema di evaluashon ta
esensial den kada kompania. Mayoria biaha ta evaluá miembronan di personal si. Den
kaso di gerensia kosnan ta mas difísil. Mayoria dirigente i supervisor no a kustumbrá dje
tantu ei pa dil ku krítika. Hopi di nan no gusta krítika. "Krítika mester ta konstruktivo sí"
nan ta bisa e ora ei. Bon mirá nan ke men: "Bo no tin mag di bisa nada negativo di mi!"
Kon awor bo mester pone un proseso di evaluashon di gerensia asina kana di tal manera
ku e ta efektivo tambe?
Evaluashon propio
Mi ke diseñá un posibel ruta pa bo. Esaki ta sali for di evaluashon propio. Hopi biaha ta
mas fásil pa un dirigente, kada tantu tempu, wak den spil i pa e mes deskribí kiko e ta
mira ku pa un otro hende bis’é esei. Sinembargo, tur hende sa tambe ku wak bo mes di
forma efektivo ta algu ku bo mester siña. Esaki no ta bai di mes, pero tin medionan di
sosten pa esaki si.
Laga nos tuma un hunta di komisario komo punto di salida. Ki ora un komisario
individual ta útil i ki ora e no ta? Segun mi e mihó manera pa midi utilidat di un
komisario ta dor di wak e balor agregá ku e tin pa e kompania. Pues esaki ta un pregunta
outokrítiko ku kada komisario individual por hasi su mes. Kue un pida papel i un pèn i
skibi numa: "mi balor agregá pa e kompania ta ku mi ......." i e ora ei ta sigui tres òf sinku
punto.
E tentashon ta grandi e ora ei pa skibi kosnan general ku ta polítikamente korekto,
manera "mantené supervishon riba gerensia" i "duna konseho". Sinembargo esaki no ta
sufisiente. Akinan bo mester skibi for di kiko e balor agregá akí di abo komo persona ta
sali na kla i tambe dikon segun bo e otro komisarionan i gerensia i akshonista lo ta di
akuerdo ku esaki.
Si bo por hasi e ehersisio ei, e ora ei rápidamente lo bo deskubrí bo propio argumento na
aparensia. E ora ei lo bo keda konfrontá ku bo propio ilushonnan. Si bo skibi por
ehèmpel ku bo ta konsehá gerensia i bo no por duna ni por lo ménos dos ehèmpel di
esei, inkluso e apresio ku a bin dilanti pa esaki di e ko-komisarionan i/òf gerensia, e ora
ei probablemente bo ta un konsehero ménos efektivo ku bo ta kere. Si bo skibi ku bo ta
kontrolá gerensia di forma efektivo i ku bo ta vigilá komo komisario pa kosnan straño no
sosodé, e ora ei di esaki tambe bo mester por duna algun bon ehèmpel. Si bo no por hasi
esei, e ora ei probablemente bo no ta mas ku un persona molestioso. Of ta sali na kla ku
bo no ta vigilá interes di kompania sino bo propio interes. Of interes di un sierto grupo
òf partido i no e interes (eksklusivo) di e kompania.
E kos bunita di e evaluashon propio akí ta ku e ta dirigí riba identifiká pa bo mes ki tipo
di kondukta a resultá di ta efektivo pa e kompania. Tambe t’asina ku bo por kuminsá
independientemente ku e método akí. Niun hende no mester wak e òf les’é. Hasié riba
un anochi pèrdí òf den wikènt! Si e resultado ta abou, e ora ei bo sa en todo kaso ku bo
tin kos pa traha ariba.
1
Di individuo pa organisashon
Un kontinuashon por ta pa trata e resultadonan di e ehersisio akí kolektivamente den e
Hunta di Komisario òf gerensia. E ora ei bo por tèst bo opinion personal tokante bo
propio mira di bo trabou òf interpretashon di esaki ku bo ko-komisarionan.
Esaki ta kondusí e ora ei na kòmbersashonnan masha interesante. Esakinan lo no trata
solamente funshonamentu individual, pero tambe i spesialmente e pregunta kiko bon
mirá kada ken ta ferwagt di otro i kiko nò. E diskushon ta skùif e ora ei di
funshonamentu di un komisario individual pa funshonamentu di e Hunta den su
totalidat. E pregunta sentral ta bira e ora ei: nos supervishon ta efektivo i for di kiko esaki
ta sali na kla? Si no t’asina, kiko nos por hasi realmente pa mehorá e kalidat i efektividat
di nos supervishon? Den e kaso ei, evaluashon no ta un ehersisio sin sentido, mekániko i
molestioso, pero e ta kontribuí realmente na desaroyo di e kompania i di bo mes den bo
papel. I t’esei ta e punto importante: konosé bo mes!
Bo tin pregunta tokante di corporate governance? Sea asina bon di mand’é na
[email protected] i ken sa, bo pregunta lo por wòrdu trata den nos
próksimo kolumna!
2