Notulá
Transcripción
Notulá
Notulá Algu aparentemente simpel manera traha nótulo di un reunion semper ta lòs hopi pregunta. Ta obligatorio pa traha nótulo? Mester traha nótulo ekstenso òf mas bien kòrtiku? Un lista di resolushon por ta sufisiente? Ken ta determiná kiko ta bin òf laga di bin den nótulo? Aki mi ta trata algun di e preguntanan akí. Nótulo di un reunion di Hunta di Komisario òf di un Direktiva (a ménos ku statutonan ta stipulá otro) no ta obligatorio, pero e ta nesesario si. E nótulonan ta forma un relato di un reunion anterior. E nótulonan ta fungi komo resúmen i rekordatorio. Nan ta fungi tambe komo guia pa akshon i komo prueba pa resolushonnan adoptá. Pues nótulonan tin un nifikashon práktiko i hurídiko importante pa kada direktiva i kada hunta. Si bo no mantené bo nótulonan, e ora ei bo ta funshoná di forma amaturístiko. Nótulonan bashí, kaminda ta solamente kopia agènda di e reunion no tin sentido. Meskos ta konta pa un relato literal masha largu mes di loke a diskutí, inkluso tur chèlèlèmentu. Trahamentu di bon nótulo ta un abilidat. Ta nesesario pa presidente di e Hunta òf di e Direktiva asumí responsabilidat pa kontenido i kalidat di e nótulonan. Ta su tarea pa sòru pa e notulista indiká e resolushonnan di forma korekto i pa e puntonan di akshon ta bon kla i pa nan risibí follow up adekuá. Esaki ta un tarea ku ta balotá hopi biaha. Mayoria biaha ta kopia kontenido i forma di e nótulonan for di den pasado. "Semper nos a hasié asin´akí." Of e notulista ta determiná kon e forma ta. Esaki bo mester buska moda di evitá. Ta importante pa regularmente verifiká si e sistema di notulá ta kuadra ku deseo di miembronan di Hunta òf di Direktiva. Mayoria biaha e nótulonan ta sigui sekuensia di e agènda. Akinan e famoso prinsipio "garbage in, garbage out" (hinka porkeria, produsí porkeria) ta konta. Si e agènda no ta bon formulá, e reunion lo no kana bon tampoko. Minimalmente mester tin pará den e nótulonan kua ta e resolushonnan ku a adoptá i kua punto di akshon a formulá relashoná ku kada un di e puntonan di agènda. Na final di tratamentu di kada punto di agènda, presidente di reunion mester eksplísitamente laga un votamentu tuma lugá relashoná ku e resolushon en kestion i determiná si esaki ta un mayoria. Si formulá un punto di akshon, e ora ei e presidente mester resumí esaki i determiná ken ta responsabel pa e akshon relevante. Si e presidente keda sin hasi esaki, e notulista mes mester wak un manera pa rekonstruí esaki i esaki por resultá den tur sorto di inklaridat i komplikashon ku ta simpel pa evitá. Dependé di e tipo di reunion i kompleksidat di e temanan diskutí, trahamentu di un lista di resolushon por ta sufisiente. Tin biaha ta agradabel pa splika kòrtiku pa medio di resolushon kiko tabata e puntonan di mas importante den e deliberashon. Esaki ta hasi posibel pa rekonstruí despues kon e adoptashon di resolushon a tuma lugá. Den organisashonnan mas chikí, mayoria biaha e sekretario por sòru pa trahamentu di e nótulonan. E desbentaha ta ku trahamentu di bon nótulo ta eksigí hopi konsentrashon i e posibilidatnan pa e sekretario partisipá den e diskushon ta keda limitá e ora ei. P’esei hopi biaha ta apuntá un notulista apart den organisashonnan mas grandi. E persona akí no ta partisipá den e deliberashon. E notulista mester tin sufisiente formashon pa fiha i resumí kompleksidat di loke a keda diskutí. Mayoria biaha, ekonomisá riba notulamentu ta algu bobo pa hasi. Den un siguiente reunion ta fiha e nótulonan. Esaki ta djis pa verifiká si kontenido di e adoptashon di resolushon ta korektamente indiká. Fihamentu di nótulo ta un resolushon formal. Sinembargo, e resolushonnan fihá den dje tin forsa legal for di momentu ku nan keda adoptá. Presidente di reunion no tin e outoridat pa fiha e nótulonan di un banda so òf independientemente, a ménos ku esaki ta 1 eksplísitamente determiná den e statutonan. Si den e statutonan òf reglamento tin pará ku e presidente i sekretario tur dos mester firma e nótulonan, esaki no ta nifiká ku nan tin e outoridat tambe pa fiha kontenido di esaki. Esaki en prinsipio semper ta un outoridat di e Hunta òf di Direktiva mes. Aparte di esei, e konsekuensia legal si e presidente hasi esaki tòg ta limitá. Un miembro di Hunta òf di Direktiva, den kaso ku e no ta di akuerdo ku e manera ku a fiha e adoptashon di resolushon, semper tin e oportunidat pa deklará ku a indiká e resolushonnan en kestion di forma robes. E ora ei, e mester por hasi esaki aseptabel si. I si e otro miembronan di e Hunta ku tabata presente na e reunion ta sostené interpretashon di e presidente, e ora ei tur kos a kaba tambe einan. Den tal kaso bo tin mag di eksigí pa bo opinion òf punto di bista desviante keda notulá. Si nenga esaki, esaki lo ta kontra di artíkulo 2:7 di Kódigo Sivil: e persona- i órganonan ku ta envolví ku e persona hurídiko, mester komportá nan mes pa ku otro di akuerdo ku regla di bon fe. Pues demostrá un bon komportashon. E ta keda notulá. 2