Komunikado Pres Parl 110912

Según Presidente di Parlamento Asjes, pa promé biaha den historia…
PARLAMENTO TA DUNA KUENTA I RASON NA
PUEBLO DI KÒRSOU
WILLEMSTAD – Pa promé biaha den historia Parlamento ta duna kuenta i rason di un forma
direkto na Pueblo di Kòrsou na klausura di un aña Parlamentario. “Pa medio di un foyeto, ku
den e dianan binidero lo wòrdu repartí pa tur kas na Kòrsou, nos ta presentá e trabounan ku
Parlamento a bin ta hasi na interes di Pueblo durante e periodo 10 di òktober 2010 te 10 di
sèptèmber 2012. Un periodo hopi produktivo ku logronan konkreto tantu riba e tereno
organisatorio komo legislativo”, asina Presidente di Parlamento Asjes a deklará.
E Parlamento aki realmente a logra funshoná komo Kas di Pueblo, kaminda un i tur semper por
a sinti nan mes bonbiní i tambe ta promé biaha den historia ku Parlamento a bishitá barionan di
Kòrsou na un manera organisá i strukturá. “E akogida abrumador ku e proyekto ‘Parlamento
den Bario’ a risibí ta demostrá ampliamente e nesesidat pa sigi tene enkuentronan ku
habitantenan den bario, konsiderando e tantísimo pregunta-, remarke- i sugerenshanan ku na
kada un di e seshonnan a keda lansá den direkshon di e Parlamentarionan presente”.
Sr. Asjes ta aploudí e forma efisiente, efektivo ku e ekipo di Grefi di Parlamento a funshoná i e
manera pro-aktivo ku nan a duna realse na e tarea legislativo ku Parlamento tin. Danki na e
trabou duru di un i tur, nos por wak bèk riba un total di 30 proyekto di Lei ku a keda entregá di
kua 25 a pasa tratamentu públiko i wòrdu aprobá durante e periodo 10 di òktober 2010 te 10 di
sèptèmber 2012. Ademas, frakshonnan di Parlamento a entregá 6 proyekto, esta Inisiativa di Lei
di kua e Lei ’80-20’ ta e úniko ku a pasa tratamentu públiko i wòrdu aprobá. Manera ta konosí, e
Lei ’80-20’ ta pone òrdu den nos sektor laboral i ta duna mas hende lokal un oportunidat hustu
pa haña trabou.
Den e parti patras di e foyeto menshoná Parlamento ta lansa su wèpsait nobo p’asina tene
kontakto di forma digital tambe i duna mas informashon relevante na públiko en general. Awor
Pueblo di Kòrsou por sigui e trabou i desaroyonan di Parlamento di Kòrsou via dje wèpsait
www.parlamento.cw unda entre otro bo por haña informashon dje organisashon, tareanan,
funshonamentu, miembronan di Parlamento aktual, komishonnan di Parlamento, reglamentu di
òrdu, kompetensianan i agènda di reunionnan ku lo tin di Parlamento. Den e sekshon medio
digital e bishitante lo por wak potrèt i videonan di eventonan ku a tuma lugá den Parlamento.
Parlamento di Kòrsou awó ta brinda henter Pueblo, gruponan di interes, studiantenan i nos
kompatriotanan den eksterior tur oportunidat di sigui aktividatnan i trabounan ku Parlamento
di Kòrsou ta desplegá na nòmber di Pueblo di Kòrsou.