Evaluá

Evaluá
Mart tabata un luna interesante pa e kódigonan di corporate governance den Reino. Na Kòrsou,
Komishon Willem a presentá gobièrnu su rapòrt di evaluashon riba Kòrsou su Kódigo di Corporate
Governance. Na Hulanda na e momentunan aki (te ku 6 di aprel 2016) tin un periodo di konsulta di
mas ku ocho siman ta tumando lugá. Den e periodo ei a invitá tur hende pa reakshoná riba e asinayamá Dokumento di Konsulta di e Komishon di Supervishon Kódigo di Corporate Governance
(Komishon Van Manen). Tur hende tin mag di partisipá na e debate públiko di Hulanda tokante
revishon di e Kódigo (hulandes).
E kódigo di Kòrsou i esun di Hulanda ta parse otro un tiki. Pero e diferensianan den área di
aplikashon ta esensial. E kódigo di Kòrsou ta solamente destiná pa entidatnan di gobièrnu. E kódigo
di Kòrsou no ta konta pa negoshi privá. E kódigo hulandes ta hustamente solamente destiná pa
negoshinan privá, prinsipalmente pa empresanan kotisá na bolsa. No opstante, mayoria empresa
grandi no-kotisá na bolsa na Hulanda ta sigui e kódigo di forma boluntario.
Kòrsou tin un ordenansa nashonal di Corporate Governance. Eiden ta stipulá eksaktamente pa Pais
kon mester anda komo akshonista den tumamentu di desishonnan krusial. Riba esaki mester pidi
konseho independiente fo’i delantá tambe. Hulanda no tin lei (formal) ku no ta un referensia den KS
na e kódigo di corporate governance. Na Hulanda no ta pone ningun opstákulo pa Estado relashoná
ku e manera ku e ta ehersé su derechinan di akshonista. Nada straño antó ku ámbos evaluashon na
tur dos banda di oséano ta bai tokante kosnan totalmente distinto. I esaki ta bon tambe. E situashon
den ámbos pais ta diferensiá konsiderablemente.
E rapòrt di Komishon Willem no ta públiko ainda. Segun medionan di komunikashon, e
konklushonnan ta entre otro ku Kòrsou su kódigo lo no ta transparente i ku lo a hasié muchu rígido.
Tambe, segun e Komishon lo mester a bin un trayekto di formashon kontinuo pa atministradó-i
supervisornan. E prinsipio – i bon kustumbernan di bon atministrashon lo no ta biba
sufisientemente serka esnan envolví. Si esakinan enbèrdat ta algun di e konklushonnan, e ora ei lo mi
ta di akuerdo ku nan. Ta bèrdat ku lo por a hasi e kódigo un tiki mas aksesibel. Na e momentunan
akí un grupo entusiasmá di studiantenan master di University of Curacao ta trahando un modelo pa
un ‘Code light’, un kódigo di corporate governance ku ta mas simpel i uzabel pa empresanan
relativamente chikí. Ta ferwagt nan proposishon pa meimei di e aña akí. Un estudio ta krusial
enbèrdat. Mayoria atministradó i supervisor den entidatnan di gobièrnu lo tin gana di mas
konosementu i komprondementu tokante atministrá i ser atministrá. Hopi asuntu ku ta bai robes
den governance di entidatnan di gobièrnu, no ta pa motibu di falta di boluntat pero hopi biaha dor
di un falta di konosementu i komprondementu. Esaki ta bon notisia, pasó ta algu ku por hasi algu na
dje.
Na Hulanda ta un diskushon kompletamente otro ta tumando lugá. Segun e rapòrt di Komishon
Van Manen, tur kompania AEX i práktikamente tur kompania AMX, AMS i kompanianan lokal ta
kumpli ku e kódigo. Ta solamente kalidat di e splikashon (si no apliká e stipulashonnan den un kaso
konkretu) lo tabata por mihó. Meskos ku na Kòrsou, t’asina ku pa e aplikabilidat di e kódigo na
Hulanda ta konta e prinsipio di ‘apliká òf splika’. Den kaso di no-aplikashon na Hulanda tin
nesesidat debesenkuando pues di splikashon. Mas aleu ta interesante ku KomishonVan Manen ta
mustra riba e echo ku un funshon di ouditoria interno na kompanianan hulandes no ta presente den
hopi kaso (40%). E funshon di ouditoria interno ta hunga un papel importante denter di e
1
sistemanan interno di rísiko i kòntròl. Komishon Willem tambe a señalá e punto akí pa Kòrsou su
situashon: na entidatnan di gobièrnu na Kòrsou tin muchu tiki atenshon pa kòntròl di riesgo.
Un otro punto interesante den e rapòrt di Komishon Van Manen, ta e konsiensia mas amplio, ku a
señalá na Hulanda (kompará ku ántes), di diversidat (‘diversity’)den direktiva – i órganonan
supervisorio. Esaki ta bon notisia. Sinembargo, un stipulashon ku segun Komishon Van Manen, nan
no ta apliká sufisientemente na Hulanda ta e limitashon di e periodo di legislashon di supervisornan.
Mihó bisá : komisarionan ta keda sinta muchu largu riba nan stul kómodo. Ta rekomendá un
periodo di maksimalmente nuebe (3x3) aña. Na Kòrsou kosnan ta otro. Serka nos ya nos ta kontentu
kaba si logra haña un bon atministradó òf supervisor. Esaki ta e desbentaha di un pais chikí. Ta un
otro bon ilustrashon di e nesesidat pa den aplikashon di reglanan di governance, keda respetá e
partikularidatnan di e pais. Pues e evaluashon di Kòrsou i esun di Hulanda no ta parse otro mashá. E
ta bon asina.
2