Les 7 pa 7-13 ougùstùs HESUS TABATA LUCHA - Joycita
Transcripción
Les 7 pa 7-13 ougùstùs HESUS TABATA LUCHA - Joycita
Les 7 pa 7-13 ougùstùs HESUS TABATA LUCHA PA NAN BIENESTAR LESA: Jonas 3:4-4:6; Lukas 19:38-42; Mateo 5:43-47; 1 Korintionan 13; Marko 8:22-25; Filipensenan 2:35; Santiago 2:14-17. TEKSTO PRINSIPAL: "O Jerusalem, Jerusalem, abo ku ta mata e profetanan i ta piedra esnan ku ta wòrdu mandá serka dje! Kuantu biaha Mi no tabata kier a hunta bo yunan, manera un galiña ta hunta su puitunan bou di su halanan, i boso no tabata kier" (Mateo 23:37). Serka un sierto kongregashon tin algun hende ku ta skats dilanti misa, i nan ta pasa bai paden pa partisipa den e servisio divino. Pakiko? E misa aki ta reuni den un sentro di hoben, ku ta keda netamente banda di un kancha di skats. Gobiernu a laga traha e parke aki pa krea un sentro di rekreashon saludabel kaminda hobennan por bini huntu. Di e forma aki nan tabata purba baha e nivel haltu di kriminalidat entre e hubentut. Ora ku e sentro pa hobennan i e parke di skats tabata kla, gobiernu a buska un religion ku kier a tene nan servisionan den e lugá ei. Lidernan di e gobiernu munisipal tabata di opinion ku presensia di un misa lo ta un influensia moral positivo pa e hobennan ku tabata hasi usá di e parke. Nan a invitá representantenan for di diferente religion, di kua ta un so a asepta e desafio, esta un iglesia ku un sabatskol i un kulto divino djasabra mainta. Miembronan di e iglesia Atventista aki tabata hopi entusiasma pa muda bai na a sentro di hobennan, pasobra esnan ku tabata skats tabata forma parti di e grupo ku nan ke alkansá. Di akuerdo ku a kongregashon lokal aki 'iglesia' mester ta un sosiedat ku no to eksisti pa su mes, pero pa otronan. Esaki mester konta pa tur nos iglesianan. Traha e les aki pa 13 ougùstùs. Djadumingu, 7 ougùstùs JONAS NA NINIVE Lesa Jonas 3:4- 4:6. Ki problema serio e profeta aki tin ku su komportashon? Den Jonas 4 ta haña e profeta sinta na kosta ost di e gran stat Ninive. El a hiba e mensahe di destrukshon manera Dios a pidí’é. El a pensa riba su biahe, kon e no tabatin smak di bai mes na e lugá ei di Ninive i el a korda riba su taktika ku el a usa pa kore bai, el a korda di Dios Su insistensia pa bolbe trese bek pa kumpli ku su mishon, tambe e tres dianan ku el a nabegá den barika di e piská, i e biahe largu for di kosta pa interior di e pais. Pa kiko tur esaki tabata sirbi? P'asina Dios rekonsiderá i mustra Su miserikòrdia na e hendenan despresiabel aki? E hendenan a arepentí, pero Jonas ta sinti enganá. E tabata sinti deshonra i malusa. Su speransa tabata ku destrukshon di e stat pagano aki ku 120.000 habitante, lo laga hende mira Dios Su preferensia pa Su pueblo, i ku e odio ku Jonas tabata sinti pa e Ninevitanan lo keda hustifika. Lesa Lukas 19:38-42. Kiko tabata pasando akinan, i kua tabata Hesus Su reakshon pa Jerusalem? Ochoshen aña despues di e tempu di Jonas Hesus tabata sinta riba un buriku riba kabes di un seru ku bista pa Jerusalem. Por a tende palabranan di elogio pa E 'ku ta bini manera rei, den nòmber di Señor'. Yen di speransa e hendenan tabata grita: 'Pas den shelu i honor na e Todopoderoso!' (Lukas 19:38). Meimei di e entrada triunfal aki Hesus a keda para ora E tabata aserkando e stat. El a yora i a bisa: 'Mara bo por tabata sabi awe kiko ta trese pas!' (Lukas 19:42). Wak e kontradikshon akinan. Jonas a obedese Dios Su mandato ku desgana i tabata sinti tiki pa bienestar di e habitantenan di Ninive. Hesus tabata aserkando Jerusalem ku un karga pisá riba Su kurason, pa nan por asepta e salbashon kostoso ku E tabata ofrese nan. Dos stat: Ninive i Jerusalem. Dos mensahero: Jonas i Hesus. E diferensia ta kla. Akinan Hesus a mustra un ehempel perfekto di e aktitut apnega, konsidera ku ta desee lo mehor pa su próhimo. Mara nos tambe, pa grasia di Dios, tin mes un aktitut ku Hesus tabatin pa esnan perdi. Kon egoismo por hunga un ròl ora trata salbashon di otronan? Djaluna, 8 ougùstùs E PRINSIPIO 'A PESAR DI' Un hòmber ku lepra a aserká Hesus i a suplik'E pa E kur'e. E opinion koriente tabata ku e hòmber aki mester biba separá, leu for di hende. A pesar di esei Hesus a mishi ku e leproso i a kur'e (Mateo 8:1-4). Pedro a nenga tres biaha ku e no konose Hesus (Juan 18). Pero a pesar di esei Hesus a tum'e bek den servisio pa yuda ku Su trabou mishonero (Juan 21). Dios Su kongregashon na Korinto tabata malagradesido pa ku Pablo su outoridat i influensia. Pero a pesar di esei Pablo a sigui sirbi nan (2 Korintionan 12:14,15). E prinsipio aki di 'a pesar di' òf 'mes tantu' ta hopi importante ora nos ke laga mira e karakter ku a intervení pa bienestar di e hendenan. "Mion di hende ku tabata na punto di bai perdi, ku ta mará dor di kadenanan di ignoransia i piká, nunka a yega di tende di e amor di Hesus pa nan. Si mester boltu nos situashon ku esun di nan, kiko nos lo a desea pa nan hasi pa nos? Riba nos ta deskanse e obligashon santu pa hasi tur loke nos por pa nan. E regla di oro di Kristu, ku nos lo wòrdu hunga kune ta bisa: 'Tur loke bo ke pa hende hasi pa bo, abo hasi pa nan' (Ellen G. White, De Wens der Eeuwen, 'Un di Mi Rumannan Mas Chikitu', p. 533. E regla di oro aki ta fundamentu pa un mentalidat di trabou mishonero ku ta orientá su mes riba loke ta bon pa e hendenan ku nos ta sirbi, na lugar di pensa riba a bentahanan pa nos mes. Lesa Mateo 5:43-47; Lukas 6:27,35; 23:34. Ki punto importante Hesus ta laga nos mira akinan relashona ku nos aktitut pa ku un grupo espesifiko di hende? Hesus ta yama nos pa demostrá amor i kariño na e hendenan a pesar di e echo ku nan ta odia nos, òf ku nan ta nos enemigu. Ripará tambe ku Hesus ta liga e komportashon aki i amor ku e karakter di Dios Mes. '...stima bo enemigunan, hasi bon i fia sèn na otronan sin spera nada bek; i boso rekompensa lo ta grandi, i boso lo ta yunan di e Haltisimo; pasobra E mes ta kariñoso ku ingratonan i malbadonan" (Lukas 6:35). Kon nos por kompronde ku Dios ta bon pa esnan ku ta ingrato i malbado? Kon esaki ta kontesta por ehempel e pregunta 'Pakiko esnan sin dios tin biaha ta prosperá tantu asina'? Den ki forma Romanonan 2:4 ta hunga un ròl den a tema aki? Djamars, 9 ougùstùs AMOR LO KABA NUNKA Segun Hesus e dos mandamentunan mas grandi ta pa stima Dios i stima e prohimo. Apart di esei El a laga nos sabi tambe ta ken ta nos próhimo. No tin duda ku e bida di Hesus, for di komienso te fin, tabata un ekspreshon di Dios Su amor puru pa nos, E mes tabata amor (Lukas 10:27-37). Asina nos tambe tin ku stima si nos ke reflehá e karakter di Dios i revelá na otronan ta ken Dios ta. Wak esaki di otro forma. Bo manera di biba por ta 'diskulpanan' ku hende ta usa pa nenga Kristu i kristianismo? Ki ehempelnan bo por haña den historia di mundu, òf asta di awendia, kon 'kristiannan' òf a lo menos hende ku ta yama nan mes 'kristian' ta hasi aktonan spantoso, tin biaha asta den nòmber di Hesus? E buki di Daniel no ta spierta nos di esaki (mira Daniel 7:24, 25 òf Romanonan 2:24)? Ta sorprendé nos ku hopi hende den tur siglo, i asta awe, no ta mustra ningun interes den kristianismo? Pa e motibu ei e deseo mester ta muchu mas grandi pa refleh'E den nos mes bida. No tin un manera mas poderoso pa alkansá esaki ku stima, pa medio di e amor ku Hesus mes a lagá mira, tambe demostrando esaki den nos mes bida. Lesa 1 Korintionan 13. Kiko ta 'amor' segun Pablo? Kiko e ta bisa ku amor no ta? Kiko e ta bisa amor ta hasi? Kiko e ta bisa di loke amor no ta hasi? Den poko palabra, kon nos mester ekspresa amor den nos bida komo kristian, i ki ròl amor tin den nos testifikashon den komunidat? Djarason, 10 ougùstùs E DI DOS TOKE Lesa Marko 8:22-25. Ki les spiritual nos por siña for di e echo ku e hòmber siegu no a kura kompletamente despues di e promé toke di Hesus? Despues ku Hesus a pone skupi riba wowonan di e hòmber siegu, El a mishi kuné i a puntr'e 'Bo ta mira algu?' Pakiko Hesus a pone skupi riba su wowonan? Den literatura antiguo por haña artikulonan ku ta splika kon dokternan antes tabata usa skupi. E milager aki ta parse esun di kurashon di e sordo mudo ku a tuma lugá na Dekapolis (Marko 7:31-37). Pero diferente for di Su otro milagernan di kurashon, kurashon di e hòmber siegu a tuma lugá den dos stap. Lesa atrobe Marko 8:23, 24. Kon bo ta analisa e kontesta ku e hòmber a duna pa e pregunta 'bo ta mira algu'? "Mi ta mira hende, nan ta manera palu ku ta kana rònt' (Marko 8:24). Esei ta bisa ku e por distinguí hende solamente for di palu dor di nan moveshon. Kon nos, ku por mira spiritualmente, por aplika esaki pa nos mes bida? Kisas nos ta mira hende manera 'palu', manera opheto. Esaki por nifika ku nos no ta mira nan realmente komo ser humano ku nesesidatnan real. Nos ta mira nan manera ophetonan, number, ku nos ke pa nan bin den misa, pa kisas subi e kantidat di miembronan batisa, òf pa `saka nos kara', lanta nos prestigio komo un bon kristian, ganado di alma. Lesa atrobe Markos 8:25. Kua por ta e rason pakiko Hesus a kura e hòmber aki den dos stap? E tekstonan prome ku esun aki ta konta ku prome ku El a hasi e milager aki, Hesus tabata atende un otro sorto di seguera: i por mira kla ku Su disipelnan no tabata kompronde nifikashon di loke Hesus a bisa di 'Tene kuidou! Warda boso mes for di zurdeg di e fariseonan i di e zurdeg di Herodes'. (Marko 8:15). Nan a kere ku Hesus tabata ke men ku nan no a kana ku sufisiente pan pa nan biahe den boto. Hesus a yama nan siegu: 'Boso tin wowo, pero no ta mira' (Markos 8:18). No ta hende pafó di misa so tin mester di e toke kurativo di Hesus. Den misa tambe sa tin seguera. Miembronan di iglesia ku ta siegu parsialmente, ku ta mira ser humano komo djis estadistika i opheto di uso, lo no kapta ku nan ta siegu, òf lo no tin kunes mes, ku hopi 'beibi’ nobo den Kristu ta bandona iglesia via e porta patras. E miembronan aki tin mester di e di dos toke di Hesus pa nan bista spiritual, pa nan por mira tur kos den un lus mas kla, i stima otronan, manera Hesus a stima hende. Djaweps, 11 ougùstùs IGLESIA PA E PROHIMO "No hasi nada ku un aktitut di egoismo òf orguyo, ma ku umildat laga kada un di boso konsiderá e otro mas importante ku e mes; no buska boso interes personal so, ma buska tambe interes di otronan. Laga tin den boso e aktitut aki ku tabatin tambe den Kristu Hesus" (Filipensenan 2:3-5). Den ki forma e prinsipionan presentá den e sekshon di tekstonan aki mester domina den nos bida? I kon e prinsipionan aki mester tin influensia ribá e forma kon nos ta trata tantu e hendenan den nos misa, i tambe hendenan eifó den nos komunidat? Hesus no tabata pensa riba Su mes tempu ku E tabata ribá tera. Su plannan tabata dirigi riba e bienestar di otronan. Hopi di Su trabou di servisio tabata orientá riba atende esnan ku bin inespera pa ayuda, manera ora Jairo a bin interumpiE pa pidi pa E bin kura su yu muhe ku tabata muriendo. I riba kaminda pa Jairo su kas, Hesus ta wòrdu interumpi atrobe dor di un muhe ku problema di sanger pa djesdos aña largu (Marko 7:31-37). Kristu Su iglesia ta manera Su mannan i Su kurason akinan riba tera. Hesus tabata stima hende, ariba tur kos, i un iglesia ku di berdat ta pertenese na djE lo hasi meskos. Un amor inkondishonal pa hende lo pone ku tin biaha mester desvia for di plannan prepará adelanta. Pa hopi iglesia boutismo ta algu hopi importante. E akto di boutismo mes ta algu bunita i e ta un kumplimentu di Mateo 28:19. Pero kua ta boso motivashon komo iglesia pa batisa hende? Di berdat boso iglesia ta desea pa e hendenan risibi e bida abundante ku Hesus ta ofrese ora nan batisa (Juan 10:10)? Tabatin un iglesia ku tabata ofrese un programa di kuminda na un bario hopi suak sosialmente den sierto stat. E pastor a tende miembronan bisa: 'Mihó nos para e programa aki di alimentashon, pasobra e no ta hiba na mas miembronan boutisa.' Un otro kongregashon a kaba di laga konstrui un otro edifisio di iglesia, ku nan tabata masha orguyoso di dje. Ora ku e pastor a ofresé pa invitá tur e hendenan den bisindario pa bin na e misa pa eventonan manera Klub di Fakansi Beibel Skol òf lekturanan tokante salut, pa e hendenan sera konosi ku e ambiente di iglesia, e prome preokupashon tabata pa nan no bin susha i daña e tapeit nobo ku nan a pone. I pa no hasi daño na e wesenan nobo. Kompara e dos iglesianan aki ku esun ku a bin reuni den e parke di skeitbòrt. Lesá a versikulonan pa awe di nobo. Kon bon nan ta reflehá bo aktitut atrobe pa ku otro hende? Djabierne, 12 ougùstùs PA MAS ESTUDIO: Lesá Ellen G. White, 'Nos Ehempel' for di Weg tot Gezondheid, p. 13-20; 'Un Kos Bo Falta', p. 429433 for di De Wens der Eeuwen; 'Un Bida Sosial', p. 186-188; 190-192; 194-196 di e buki My Life Today. Ta siguramente berdat ku poko hende, pa varios motibu, ta bin serka nos di nan mes. Meskos ku Hesus a bin abou na tera, di Su mes i a bin alkansa nos kaminda nos tabata, nos mester hasi meskos pa otronan. Esaki lo no mester ta dje difisil ei. Tin hopi sorto di hende den mundu ku diferente sorto di nesesidat. Mundu ta un lugá herida, destrosa kaminda hende herida i destrosa ta biba, ku den algun kaso ta anhelá mare tin un hende pa skucha nan, un hende ku nan por papia kuné, un hende ku ke nan bon. I klaro, komo iglesia nos mester ta kla pa te na sierto nivel duna e yudansa ku tin mester. Nos mester ta kuidadoso pa no hasi nos mes kulpabel di loke Santiago ta spierta nos: ku nos tin fe, pero sin echonan pa demostra e fe ei. Ta interesante tambe ku e ta duna a spiertamentu aki, no den konteksto di dieta, bistimentu, òf komportashon personal, pero den konteksto di yuda esnan ku ta den nesesidat (wak Santiago 2:1417). Tur hende por bisa ku nan tin fe, ku nan ta kere. Ta midi e fe aki dor di e forma ku nos ta trata nos 'prohimo'. PREGUNTANAN PA DISKUSHON: 1. Lesa Santiago 2:14-17. Kon bo por yuda bo iglesia pa perkura pa nan no hasi nan mes kulpabel di loke Santiago ta spierta p'e akinan? 2. Pensa riba hendenan den Beibel ku tabata yuda otronan ku apnegashon i konsiderashon. Un ehempel ta: "Awor na Jope tabatin un disipel ku yama Tabita, loke tradusi na Griego ta nifika Dorkas; e muhe aki tabata abunda den echonan di karidat i bon obra, ku e tabata hasi kontinuamente" (Echonan 9:36). Kiko abo ta hasi den bo iglesia "Jope"? 3. Ta hopi fasil hasi bon kosnan ora ku ta elogia bo i ta pone bo komo un ehempel pa otronan sigui pa hasi 'bon obranan'. Pero kon ta pa hasi kosnan bon pa otro hende, ku niun hende sabi di dje, ku ningun hende a tende di dje, i ku ningun hende (klaro, menos esun ku bo a yuda) tin kunes mes kune? Sabat 13 augùstùs, les pa hoben 7 Titulo Mihó no tin Pregunta inisial Kua situashon ku bo tin rabia riba dje bo a pensa? Kiko bo a hasi diferente i kiko tabata e resultado? Komparti ku e grupo. Lesa huntu 1 Korintio 13:4-7 Pregunta Kuantu pasenshi bo tin? Ki ora bo ta perde pasenshi? Diskuti e punto aki ku otro. Inspirashon 'Amor ta soporta tur kos' Trata e teksto Djadumingu: versikulo 4a. Kiko ta nifika 'pasenshi' i `kariñoso'? Kiko bo ta hasi e orei? Kon amor tin pasenshi? Kiko ora amor no tin pasenshi? Tin limite na amor? Ki ora si/no? Ki ora bo ta hasi algu bon? Un otro hende ta ripara algu di esei semper? Òf un otro hende ta ripará speshalmente ora bo no ta amoroso? Diskuti e punto aki ku otro. • Djaluna: versikulo 4b. Tin biaha bo por splika algu mihó dor di bisa loke e no ta. Awor nos mes mester bai pensa. Kiko amor ta si e no ta envidia, e no ta gaba, e no ta arogante? Kiko e ta anto? Si ta amor pa no tin envidia, kiko amor ta anto? Kon esei ta traha? Kon bo por stima un hende dor di no envidi’e? Kon e persona ei ta ripara bo amor? Òf e persona no tin nodi ripara esei? Dikon si/no? • Djamars: versikulo 5-6. Ki situashon bo ta haña ora hende no ta grosero, egoista, no ta rabia, no ta odia? • Djarason: versikulo 7. Kon amor por soporta tur kos? Purba pensa kosnan ku ta insoportabel. Aplikashon • Djaweps. Kiko ta e diferensia entre kon amor ta wòrdu deskribi akinan i kon esaki ta wòrdu deskribi den nos kultura? • Djabierne. Ora bo mira e definishon di amor den kua abo ta miho? Den kua bo ta mas debil? Sabat. Den kua di e kosnan menshona lo bo ke bira miho, por ehempel mas pasenshi. Den kua kosnan lo bo ke ta menos miho, por ehempel stop di rabia lihe. Kon lo bo por logra esei? • • Tarea Purba traha un akuerdo ku bo grupo pa trata na mehora un kos den bo bida. Kada hende ta duna su palabra pa purba e siman aki.