Bèl a bati

Plenchi
Bèl a bati
Tring tring...hala bola riba plenchi pa boso no pèrdè nada e siman aki tampoko. Ta
hopi kos bon a sosodé ku kisas a pasabu forbei. Ya nos a benta mas ku un luna di
skol tras di lomba. Bo ta konsiente si no...tempu ta bula mas lihé ku rakèt. No keda
bira bira no, paso promé bo realisá ta bon nochi pasa bon. Tur lus ta paga anto bo
no a logra kumpli bo metanan. No laga pa mañan loke awe bo por hasi.
E aña aki RK ta kumpli 45 aña den e konstelashon kaminda tur e diferente
entidatnan katóliko a uni den un entidat grandi i sentral. Dia 29 di desèmber 2014
nos lo kumpli 45 aña ku e stichting a keda lantá. Nos lo bai tin algun aktividat
simpel pa nos por gradisí pa e 45 añanan tras di lomba. Keda pendiente.
Nos ta gradisí kada un di boso pa boso aporte i sosten durante e añanan ku a pasa.
Nos ke publiká diferente potrèt di e 45 aña ku a pasa. Si bo tin potrèt, sinti liber pa
manda nan pa nos pa nos por kompartí ku pueblo di Kòrsou. Un yùfrou/mener ku
bo ta kòrda, un skol den bo kurason. Tur ta wèlkòm. Manda nan libramente pa nos
riba [email protected]. Of si por pasa serka nos pa nos scan e potrèt i prepará pa
publik’é.
Orashon
Nos ta aserkando luna di òktober e luna di flor. Luna di grasia. Ban kuminsá resa
na nos Mama Maria pa e duna nos su protekshon. Protehá nos persona, nos sernan
stima i nos pais Kòrsou. Ban pidi pa e intersedé pa tin mas komprenshon i armonia.
Mas pas i trankilidat.
Mama Maria, mama di nos tur.
Nos ta gradisíbu pa bo amor grandi pa tur bo yunan.
Pa bo kuido i protekshon.
Nos ta pidibu pa sigui guia nos den e lus.
Nos ta pidibu pa tur esnan ku doló den nan alma. Fortifikanan.
Pa tur ku tin nesesidat, mustra nan e salida i manda angelnan pa yuda nan.
Pa tur mucha, espesialmente esnan lubidá, rekogénan i manda protekshon.
Pa tur ansianonan, espesialmente esnan bandoná, rekogénan i manda yudansa.
Pa nos pais Kòrsou, trese pas den kurason di kada habitante.
Danki Mama Maria pa tur fabor pidi i pa tur esnan ku bo mes skohe pa kambia.
Amen
Den agènda



6 pa 10 di òktober fakansi di skol
Dia di dosente dia 5 òktober
Rapòrt ta den novèmber
Riba rapòrt
RK tin un maneho di adikshon deliniá pa su skolnan. Den e kuadro aki a kuminsá
aña ku un kurso pa refreská pa tur esnan ku ta envolví. Tambe a papia riba tur
desaroyo nobo riba e tereno aki. FMA a hasi e presentashonnan i tur presente a
aportá na un manera profeshonal.
Personal ku a partisipá na e tayer tokante adikshon.
Personal ta interkambia di opinion durante tayer tokante adikshon.
Mi ta konta
E pòtlot
Albert tabata sinta ta wak televishon mientras su wela mamita tabata sinta ta skibi.
Despues di un bon ratu Albert a puntra mamita ta kiko e ta skibi anto asina tantu
tempu. “Mamita, ta kiko mamita ta skibi, ta un di mi ku mamita?” Mamita a stòp
di skibi, ku un sonrisa el a kontestá: “Si dushi mi ta skibi riba nos dos. E
palabranan pa forma e historia ta importante, pero e pòtlot ta mas importante
ainda. Mi deseo grandi ta pa bo bira manera e pòtlot ora bo krese.” Albert a keda
wak e pòtlot pero no a mira nada diferente na e pòtlot ei kompará ku otro pòtlotnan.
“Pero Mamita, e ta meskos ku tur otro pòtlot.”
Mamita a pone sinta banda di dje i a kue su man tene bisando: “Tur kos ta dependé
di e forma ku bo ta mira kosnan den bida. Den e pòtlot aki tin 5 karakterístika
básiko, si abo por logra mantené nan den bo bida, lo bo bira un persona ku semper
lo biba na pas den e mundu aki.
E promé karakterístika ta: Bo por hasi kosnan grandi den bo bida, pero no lubidá
nunka ku tin un man grandi ta guiabu den bida. E man ei yama Dios, E semper lo
guiabu den direkshon di su boluntat.
E di dos karakterístika ta: Tin ora ku bo tin ku stòp di skibi i usa bo sleiper. Esaki
ta pone ku e pòtlot ta sufri un tiki. Pero esaki ta hasi e pòtlot mas skerpi. Kier men
tin biaha bo lo sinti doló, pero ta nesesario pa bo bira un mihó persona.
E di tres karakterístika: Un pòtlot semper ta duna nos chèns pa “veeg” lo ke nos no
a hasi korekto. Bo mester komprondé ku korigí algu ku bo a hasi malu no ta algu
robes, pero algu importante pa mantené bo riba e kaminda di hustisia.
E di kuater: lo ke ta importante na e pòtlot no ta a palu of su forma, sino e parti
paden e kurason di e pòtlot. P’esei sòru di kuida espesialmente bo parti paden. Pa
bo ta un hende ku konsenshi, kurason noble i hustu.
E último: un pòtlot semper ta laga marka atras. Bo mester ta konsiente ku tur kos
ku bo hasi den bida ta laga marka atras. Kada akshon ku bo tuma mester ta
konsiente.
Un prenchi
Na st. Paulus College FO pèrsonal a sigui e di dos dia konferensha. E tópiko tabata:
Kana de pasonan di Hesus.
I nan a kombiná esaki ku Futuro ta awe.
Dia di anochi informashon kada alumno a pinta nan pia riba un karton,i ora nan mayor a
bin tuma informashon nan a skirbi algu pa nan yu riba esaki.
Skol, kas i misa ta forma un unidat pa yuda kada alumno kana riba e kaminda korekto i e
kaminda di adelanto.
Pabien na st. Paulus College ku e bunita inisiativa. Mayornan ku man i pia nos ta bai
move huntu ku boso pa hasi e aña eksitoso.
Mayornan a skibi un mensahe positivo pa nan yu na st. Paulus College FO
Mucha djispou
Anniek, di 6 aña ta partisipá na su mama ku awor si e no ta bai skol mas. E ta hopi
kansá di su yùfrou. Yùfrou no sa nada. Tur kos e ta puntra nos. Anto rabia tambe si
niun hende no sa. E ta dòm anto pulushi tambe.