Un estreno den bario di Souax

KOMUNIKADO NA PRENSA Un estreno den bario di Souax Riba 6 i 7 di sèptèmber próksimo, Sentro di Bario Souax ta forma esenario pa un evento úniko. Teatro KadaKen lo estrená su obra nobo titulá E balada di Pluisje pa un públiko amplio den bario. Ta e promé biaha den su sinku añanan di eksistensha ku KadaKen ta presentá su obra nobo no solamente na skolnan sekundario i den teatro, pero ku e grupo ta drenta barionan di Kòrsou kuné tambe. Ku esaki KadaKen ta trese teatro mas serka di kurason di nos komunidat; kual ta un di e metanan prinsipal di direktor artístiko Albert Schoobaar i su fundashon. ‘Ora nos a aserká fundashon Pro Souax i a papia ku nan tokante nos plan pa trese e obra den e bario, mesora nos ripará ku tin hopi semehansa entre nan metanan i esnan di nos’, segun Direktor Empresarial Lou Nisbet. ‘Tantu den e barionan, komo ku den nos trabou den ámbito di teatro, formashon ta un tema prinsipal. Pa medio di teatro, KadaKen ke drenta den diálogo ku públiko na un forma habrí, sin asumí un posishon di opinion. Lokual nos ke logra ta pa sostené konsientisashon riba sierto temanan òf situashonnan. I esei ta netamente lokual hopi hende den nos barionan -­‐ tantu profeshonalnan, komo boluntarionan -­‐ tambe ta trahando hopi duru riba dje: dialogá ku habitantenan di e barionan pa sa kiko ta biba bou di e hendenan i pa di e forma ei traha na formashon i konsientisashon. Nos ta hopi kontentu ku nos por sostené i fortalesé otro den esei.’ Ku su tres otro produkshonnan grandi, Teatro KadaKen a proba diferente biaha kaba ku teatro na skol por ta un instrumento fuerte i efektivo den formashon. P’esei tabata un stap lógiko pa awor amplia e ámbito dje trabou i kuminsá trese e obranan den bario. E Balada di Pluisje ta un obra sumamente adkuá pa un públiko adulto. E obra ta trata varios tema aktual, manera por ehèmpel e sintimentu ku hopi adulto awendia tin, di ta perdí den un multitut di ekspektativa. Tantu pa adulto, komo pa hoben por ta difisil pa tuma e desishonnan korekto. Tin biaha nos ta mira e konsekuenshanan di un eskoho ora ya ta muchu lat. Manera e obranan anterior di Albert Schoobaar, esun aki tambe ta trata temanan aktual i serio, pero na un manera habrí i ku inkorporashon di elementonan humorístiko, sorpresa i espektákulo. E ambiente i diseño di e esenario ta unu íntimo i ameno, lokual ta hasi e obra no solamente mas fuerte, pero tambe mas fasil pa move, i esei kemen ku por present’é kasi tur kaminda. Pa e presentashonnan na Souax, por kumpra karchi na Mensing’s Caminada i na Sentro di Bario Souax, pa 20 florin. E presentashonnan aki, dia 6 i 7 di sèptèmber, tur dos ta kuminsá 8or di anochi. Naturalmente e dos anochinan aki lo no ta e úniko funshonnan públiko di E Balada di Pluisje. Entre otro tambe lo tin funshon durante Siman di Kultura, riba djasabra 21 di sèptèmber den bario di Coronet, i riba djabièrnè 27 i djasabra 28 di sèptèmber, den bario di Montaña. Bo ke wak E Balada di Pluisje den bo bario òf na bo lokalidat tambe? Por fabor tuma kontakto ku Nacheska Johannes, Lider di Produkshon di Teatro KadaKen, via di [email protected] òf na telefòn 569 84 17.