Plenchi Bèl a bati
Transcripción
Plenchi Bèl a bati
Plenchi Bèl a bati Bèlèm Bèlèm e bèl ta kuminsá zona manera mas duru. Paso a bira poko drùk i mester bati e bèl un tiki mas duru pa hala atenshon di tur ku nos plenchi ta kla pa por akomodá tur hende. Advènt ta un dushi temporada pa nos tur drenta den e ambiente apropiá. Plenchi tin diferente notisia positivo pa bo mira ku skolnan ta trahando duru, no solamente riba e parti kognitivo, pero tambe riba formashon total di e hoben. Nos tin asina tantu hoben ku talento, ku smak i ku ke nos guia. Ban duna nan atenshon i mustranan ku nan tin balor grandi pa nos. Semper sa tin algun hoben ku ta tuma desishon robes den bida i kai. Nos tin ku yuda nan lanta bèk. Pero no laga nos duna nan so tur atenshon pa esnan ku semper ta kumpli i ta hasi nan bèst no haña e idea ku bo mester hasi malu so pa bo haña atenshon i èkstra fasilidat. Nos dosentenan tin tarea masha difisil pa traha denun klas di mas ku 20 hoben pa duna nan konosementu pero tambe formashon. Kada hoben ta otro, kada dosente tambe. Tene kuenta ku bo yu ta un den 20 piku ku tin su propio nesesidatnan. Skol ta hasi su best, pero abo mayor ku tin 1, 2 òf hasta 5 yu mes sa kon difísil ta pa komplasé tur yu pareu. Duna skol un man pa nos por hasie huntu. Huntu e ta aliviá e trabou di tur partido na benefisio di e yu. Nos hóbennan mester ta nos prioridat. Bo a korda gradisí esnan rondó di bo tambe pa nan atenshon i trabounan di tur dia? Un djasabra yen di pas i goso pa bo. Un djadomingu karga ku bendishon i pas di Señor. Ban pa un siman fruktifero. Riba roster Alumnonan di grupo 7 I 8 di Kolegio Maria Auxiliadora a haña e oportunidat pa bai snorkel ku e fundashon "Kids for Coral". Nan a bai bou di guia di mener Harold Welvaart. Nan lo pasa nan èksamen I nan mayornan ta keda invitá. Sra. Gladys a entregá/regalá skol 3 palu di mata na Kolegio Maria Auxiliadora. Alumnonan di skol mes a hinka un programa den otro. I nan mes a present'é. Den agènda Fakansi di skol: 19 desèmber te ku 4 di yanuari 6 yanuari 2015 Brindis pa 45 aña RKCS. Riba rapòrt Fiesta di lesamentu na St. Antonius College E tema tabata: 25 aña derechi di mucha Den tur grupo maestronan i nan alumnonan a lesa dushi, Tambe tur maestro a pone hopi énfasis riba derechinan di mucha, ku e aña aki a selebrá su 25 lustro. Nos a elaborá riba tur e derechinan ku nos muchanan tin. Djaweps un par di maestro a organisá un tremendo fiesta bou di overdekte. Muchanan di diferente grupo a lesa, kanta, rèp, dramatisá, pinta i traha pèchi hopi original. Nos muchanan i nos maestranan tin hopi talento! E potrètnan ta duna un bon bista di nos kreatividat. Siman di buki na st. Antoniusschool. Hobennan di St. Antoniusschool durante siman di buki Mi ta konta Wòrtel, webu of kòfi? Rhona a yega kas di su tata ku un kara largu. E tata a sinti su amargura for di ora el a kana drenta. E tata a sinta kete warda te ora Rhona mes habri su kurason. “Papa mi ta kansa, si no ta un kos ta otro. Prome mi kabe enfrentá un problema mi ta topa ku otro. Mi no por mas, mi ta entregá.” Jossy a lanta i invitá su yu kompañe bai den kushina. Den kushina Jossy a pone 3 weya na kandela. Den e prome el a pone algun wortel. Den e di 2 el a pone un webu, den e di tres el a pone bonchi di kòfi. El sende e stof pa tur tres weya herebe. Kada bes e yu ke puntre algu e ta hasi señal di warda. Despues di binti minut el a paga tur tres kandela. El a saka e wortel pone riba un tayo, e webu tambe pone riba otro tayo. El a kola e kòfi e bashé den un kòpi. “Kiko bo ta wak Rhona?” Jossy a puntra su yu. “Wortel, webu i kòfi.” Jossy a pidie pa e fula e wortel, kaska e webu i purba e kòfi. Rhona a hasi loke su tata a bise per ainda ku un kara ku yen di pregunta. “Mi yu tur tres produkto a pasa den mesun situashon difisl. Tur a herebé 20 minut den awa kayente. E wortel e drenta den e awa duru, pero al a kambia bira moli i débil. E webu a drenta frágil ku un kaska delikado pa protehá su parti paden ku ta likidó. Pero despues di ta den awa herebé su parti paden a bira duru. E bonchi di kòfinan ta diferente, el a kambia e awa duna un dushi aroma i sabor na esaki. Kua di nan dos bo ta mi yu? Ora sla di bida toka na bo porta kon bo ta reakshoná? Bo ta un wortel ku ta nase duru, pero ora dolor i kontratiempo bati na bo porta bo ta bira débil i swak perdiendo tur bo fortalesa? Bo ta un webu ku ta kuminsá bida ku un kurason amable, un spiritu ku ta kore manera líkido den bo kurpa? Pa despues di un fayesimiento, despedida of desepshon bo bira duru i sin pordon? Pafó kisas bo ta parse meskos, pero paden ku un kurason i spiritu duru, sin kompashon? Òf bo ta manera e bonchi di kòfi ku ta ora e awa yega su punto mas haltu, ta kambia e awa? Mas kayente e awa mihó e sabor. Si bo ta manera e bonchi di kòfi, ora sirkunsantsianan bira malísimo, bo ta reakshoná mas mihó i asina influenshá bo alrededor positivamente. Mi yu kua di tres bo ta, wortel, webu of bonchi di kòfi?” Mucha djispou Den lès di musik kada biaha Mario tin problema pa alkansá e “noot” nan mas haltu, ora e ta kanta. Fabiola a sinta ketu pa basta ratu pa despues i hisa man pidi palabra: “Mener tin un trapi pa nos fia Mario pa wak si asina si e por yega? Paso asina so e por alkansá”