día d`asturies

FESTIVAL INTERNACIONAL DE CINE DE XIXÓN
XIII PREMIU DE CURTIUMETRAXES “DÍA D’ASTURIES”
PATROCINÁU POR TELEVISIÓN DEL PRINCIPÁU D’ASTURIES (TPA)
Esti premiu entiéndese como un apueste pol futuru de la creación cinematográfica y audiovisual y, poro,
va valorar l’inxeniu, creatividá y bayura d’idees na realización. L’oxetivu d’esta convocatoria ye’l de da-y
puxu a la carrera de nuevos direutores y productores asturianos. Col patrociniu de Televisión del
Principáu d’Asturies (TPA), el Festival Internacional de Cine de Xixón da un premiu en metálicu de
4.000€.
BASES
1) El “Día D’Asturies” ye una seición que ta dientro de la 50 edicón del Festival Internacional de
Cine de Xixón, que se va celebrar ente los díes 16 y 24 de payares de 2012 y, poro, va ser
nestes feches.
2) El “Día d’Asturies” divídese en dos seiciones: una AMUESA NON COMPETITIVA, y una
SEICIÓN A COMPETICIÓN. La escoyeta de les obres audiovisuales va facela’l Festival
Internacional de Cine de Xixón.
3) La participación ta abierta a tolos productores y realizadores d’obres audiovisuales que seyan
naturales de la Comunidá Autónoma, residentes na mesma, o que les obres se ficieran nel
Principáu d’Asturies. Les persones participantes faen saber que los datos qu’apurren son
verdaderos nesti boletín d’inscripción.
4) Declaración responsable. Les persones participantes conseñen que los requisitos afitaos nestes
bases son verdaderon asina como que tienen abondos derechos sobre la obra inscrita pa poder
participar na seición del “Día d’Asturies”, y tamién pa poder llevar el premiu nel so casu y dar los
derechos afitaos nes estipulaciones novena, décima y decimocuarta d’estes bases.
5) La persona participante fai saber que nun va perxudicar a la Televisón del Principáu d’Asturies y
al Festival Internacional de Cine de Xixón con cualesquier reclamación propia o a terceros en
rellación coles sos obres y material promocional, y tamién en rellación cola inscripción y la so
participación dientro del “Día d’Asturies”, ensin perxuiciu de la indemnización de daños y
perxuicios que correspuendan.
6) Van poder participar nel “Día d’Asturies” les obres audiovisuales de tema y xéneru llibres, feches
durante l’añu 2012 con un duración de 30 minutos como muncho.
7) Namás van poder participar na SEICIÓN A COMPETICIÓN, los títulos que nun s’emitieron
enantes en cualesquier cadena de televisión autonómica, llocal o nacional non codificaes, nin
que fueran oxetu de comunicación pública n’Asturies enantes.
8) Pa la seleición va entregase la obra en formatu DVD enantes del 8 d’ochobre de 2012, nes
señes que vienen darréu: Festival Internacional de Cine de Xixón; c/Cabrales, 82- 33201
Gijón/Xixón.
9) En seleicionando la obra pa la so participación nel “Día d’Asturies”, ye necesario apurrir la copia
definitiva pa la proyeición nun más allá del día 5 de payares de 2012. El formatu de proyeición
tien de ser Betacam o 35mm.
10) La escoyeta d’una obra pa la SEICIÓN A COMPETICIÓN Y AMUESA NON COMPETITIVA, lleva
apareyao l’autorización pal usu del so material promocional y la emisión de retayos na Televisión
del Principáu d’Asturies, y tamién pa ponela na so web. Los retayos han tener un llargor como
muncho de tres minutos y, en tou casu, menos a la duración total de la obra. La mentada
autorización ye tanto pa los sos informativos, acordies al artículu 35 de la Llei de Propiedá
Intelectual vixente, como pa los sos programes por tiempu illimitáu.
11) Les persones participantes dan al Festival Internacional de Cine de Xixón los derechos de
reproducción y comunicación pública de les sos obres pa la so exhibición públlica dientro del
Festival. D’esta miente, el Festival ta autorizáu pa usar el nome, voz y/o imaxe del direutor/a y/o
productor/a, retayos y/o fotogrames de les obres seleicionaes, y tamién del so material
promocional pal espardimientu nel Festival por cualesquier mediu de comunicación llocal,
autonómicu, nacional o internacional. Les obres seleicionaes van tar nel catálogu de la 50
edición del Festival Internacional de Cine de Xixón y/o coleiciones o catálogos posteriores.
12) Los trabayos seleicionaos nun se van devolver y van pasar a formar parte de la videoteca y/o
archivu del Festival u organización col que tenga un conveniu. Los trabayos non seleicionaos
van poder recoyese nel plazu d’un mes dende qu’acabó’l Festival. A la contra van pasar a formar
parte de la videoteca y/o archivu enantes mentáu. Poro, pa esto les persones participantes dan
al Festival el derechu d’empréstamu ensin remuneración.
13) Si s’escoyera un curtiu pa la Seición Oficial a concursu de la 50 edición del Festival Internacional
de Cine de Xixón, enxamás va poder participar na SEICIÓN A COMPETICIÓN DEL “DÍA
D’ASTURIES”.
14) Un xuráu, formáu por tres persones (dos profesionales del mediu y un representante de TPA) y
nomáu pa esto, va dar el premiu “Día d’Asturies” enantes d’acabar el 50 Festival Internacional de
Cine de Xixón, patrocináu pola TPA dotáu con 4000€ y un diploma.Los impuestos que
correspuendan al premiu van tar a cargu de la persona beneficiaria.
15) El premiu en metálicu va pagase, en cualesquier casu, al representante de la película qu’asina lo
ponga nel apartáu 7 de la ficha d’inscripción nuna cuenta fecha pa esto. El mentáu representante
tien la condición de persona participante a los efeutos previstos nestes bases.
16) La persona participante premiada da n’esclusiva los derechos de reproducción, comunicación
pública y tresformación (promoción y subtitulaú) de la obra a Televisión del Principáu d’Asturies,
pa la emisión per televisión y/o n’internet durante dos años, con ámbitu universal y cuatro pases
como muncho.
17) La persona participante tendrá qu’apurrir una copia d’emisión al Festival de Cine de Xixón en
formatu Betacam o DVC Pro con calidá broadcast. El Festival pagará’l premiu en 90 díes a
contar dende la entrega correuta de la mentada copia d’emisión.
18) La inscripción nel “Día d’Asturies” supón l’aceutación d’estes bases y va ser competencia de la
Organización del Festival la resolución de cualesquier problema que nun apaeza nelles.